أخبار السياسة

[أخبار السياسة][btop]

أخبار السعودية

[أخبار السعوديه][grids]

أخبار الصحة و الطب

[طب و صحة][btop]

محمد أبو تريكة , لمحات من تاريخه و أفضل لحظات الجيل الذهبي للأهلي و مصر

هذا المقال كتبه Islam Imró Elkais على صفحته الخاصة , باللغة العامية المصرية , و له كامل حقوق المقال , و هو يحكي بأسلوب جميل و بسيط قصة أبو تريكة أفضل لاعب في تاريخ النادي الأهلي و منتخب مصر و يعرض فيه لمحات من تاريخه الذي كان فيه العصر الذهبي للنادي الأهلي و منتخب مصر , بشهادة كل من يعرف في كرة القدم ,, نترككم مع المقال :
*كلام كل سنة بنسمعه عن لعيب اسمه ابو تريكة الأهلي بيفاوضه بس مابيجيبوش..أغلب الاهلوية مش مهتمين..لعيب في الترسانة بيقولوا حريف بس بطئ..بيروح المنتخب في المعسكرات ويطلع في الماتشات..مش مهم مين ده اصلا؟ *ابو تريكة بيمضي اخيرا بعد مالاهلي لقي الزمالك داخل بتقله واداله فلوس فعلا..مكالمة من الخطيب -معشوق اللاعب- غيرت مساره للاهلي.... وماله يمضي اهم حاجة ان بركات جه...يارب مايطلعش مصاب زي مابيقولوا..بركات لو فحالته هيفرق جامد... *ابو تريكة فاول ماتشاته ادام طنطا فكاس مصر بيسجل هدفين فاول تعارف موفق مع جمهور الاهلي.."ده باينه لعيب حلو اهو" .

*الاهلي مع الزمالك في 2004 واول ديربي لتريكة...مغلوبين 2-صفر ..تريكة النقطة المضيئة في الماتش بيستلم الكورة بيجري بيرقص بيظبط بيرزعها في المقص فاول مغازلة حقيقية لقلوب جماهير الاهلي" ده احنا شكلنا هنحبه ولا ايه"...بنخسر الماتش بس الاهلاوية مابينسوش اللقطة دي والروح بتاعت اللعيب ده...ودي كانت اول كلمة فقصة حب طويلة مابين تريكة وبين شباك الزمالك انتهت بكونه الهداف التاريخي للديربي ب13 جول وسجل خالي من الهزائم باستثناء اول ماتش *الموسم اللي بعده الاهلي بياكل الاخضر واليابس . قطرمابيرحمش.فماتش الزمالك تريكة بيسجل كالعادة.. واحنا بنفرح بنلاقيه جري علي ثابت البطل المتلكفت ببطانية عالدكة وبيبوس راسه..وقفنا لحظة وسقفنا عالحركة الحلوة بعد ماكنا بنسقف عالجول .

*نهائي افريقيا 2005..جمهور الاهلي مستني الجول الاول لان اللي شافه من الفرقة ومن اللعيبة يخليه واثق في الفوز...ابو تريكة بوش رجله بيحطها وبينتزع الاهات وبيبتدي قصة عشقه التانية...التسجيل في النهائيات *في صدمة لجماهير الكرة المصرية عبد الوهاب بيفارق الحياة...اول ماتش بعد الوفاة...الصفاقسي في القاهرة دوري المجموعات..جمهور الاهلي معلق بانر كبير لعبد الوهاب...ضربة حرة علي حدود المنطقة..تريكة راحلها..بيفتكر صاحبه اللي كان بيقف جنبه في الفاولات ..بيحطها جول بطريقته المعهودة بيبكي ويبوس االشارة السودا وبتنخلع قلوبنا وبنعيط كلنا معاه سواء في المدرجات او ادام التلفزيون بنترحم علي عبد الوهاب وبتأسرنا مشاعر صادقة من صديق لصديقه الراحل .

*نهائي افريقيا 2006 الاهلي بفريقه الرهيب هناك مرة تانية علي بعد ماتشين بس من الاميرة الافريقية تريكة بيرفع فاول ومستني فلافيو الكورة بتعدي وبتخش لوحدها...تريكة تاني في النهائي..الصفاقسي بيتعادل...بينتهي الماتش وسط احباط رهيب..بنروح تونس وبنبتدي .....بانر كبير فمدرجات صفاقس لابو تريكة راكع وبيسلم الكاس للنفطي... بنلعب حلو ماسكين كورة ..شكلنا هنعملها ...احنا الاهلي...بيمر الوقت والتعادل سلبي...فاضل 10 دقايق وفلافيو بيحطها كرباااج جووووول ...لا في العارضة ...رجعت لمتعب ضعيفة فايد الحارس...ربنا شكله مش رايد...اكيد مش هنكسب علي طول ...مدافع صفاقس بيرفع ايده للجمهور خلاص كسبنا....الدقيقة 91...بتحصل الجملة المحفورة فقلب كل اهلاوي وبتنتهي علي شمال ابو تريكة فشبكة الجواشي...كله هيتجنن محدش مصدق الموقف اكبر من انه يتوصف...لاعيبة صفاقس بتعيط ولعيبة الاهلي هتتجنن ..ياتري كانت مشاعر جمهور صفاقسي ايه وهما بيشيلوا البانر اللي فيه تريكة راكع ومروحين هسيبها لخيالك ..ياتري كانت مشاعر الاهلاوية ايه تجاه ابو تريكة؟...مش هقولك مانت اكيد عارف...عشنا لحظات كتير حلوة وتاريخية مع الاهلي بس دي بالذات كانت خرافية..ودي كانت بدايات مااتحول تريكة من نجم كبير لاسطورة حقيقة بتتولد.

 * الاهلي فكاس العالم للمرة التانية بعد اخفاق اول مشاركة....ابو تريكة بيبصم في الماتش الافتتاحي بضربة حرة فاوكلاند..بنخسر ادام انترناسينوالي بعد مبارة من ضمن الاقوي فتاريخ النادي...بنعلب عالتالت ومستنيين الانجاز...الاهلي بيتسيد اول نص ساعة...تريكة الاسطوري وضرباته الموجعة والاول "شوف الكورة شوف الفن شوف ماراداونا شوف زيكو شوف زيدان شوف بلاتيني شوف الكورة في قلب المرمي الاهلي المصري يسجل" الفريق المكسيكي يرجع للماتش يمسك كورة ويسجل وقريب من التاني بس ابو تريكة يضرب من جديد " بو تريكة هداف المونديال 3 اهداف من الساحر من زيزو الكرة العربية من امبراطور الكرة المصرية بلانكو براسه يقول ماهذا ماهذا يازيزو موش ممكن بوتريكة ابن النيل يبدع يتالق يتعملق بالله عليكم البرونز" *الفرقة بترجع بعد اعلي انجاز فتاريخ الاهلي بيلفوا بالاوتوبيس المكشوف الجماهير في هتاف جنوني لابو تريكة ...تريكة بحركته الشهيرة بيقول اهتفوا للاهلي مش ليا .

 *تريكة مع المنتخب بعد سلسلة من انتقادات كارهيه ان هو لاعب محلي بيبتدي في 2006 بجول من بتوعه من فاول في ليبيا وبيقود الفرقة لحد قبل النهائي ميدو بيخرج غير ماسوف عليه ...الكورة تنزل لتريكة من لمسه واحدة بشماله يرفع لعمرو زكي بجول الفوز وفي النهائي بيدخل اخر بنالتي ويحقق اول لقب ويترشح فسنتها ضمن افضل 5 لاعبين في افريقيا بعد موسم اسطوري كهداف الدوري وهداف بطولة افريقيا وهداف المونديال والفائز بكل البطولات اللي شارك فيها *الاهلي راجع من اليابان مجهد بيتغلب من الاسماعيلي تريكة بيتخبط ويتعرض لحالة اغماء بيغيب عن الوعي دقائق وقعت قلوبنا وفكرتنا بعبد الوهاب الجهاز الطبي بيمنعه من النزول بيعيط وهو رافض يسيب فرقته فموقف صعب والتغييرات خلصت وبيحاول ينزل وبيمنعوه في مشهد مايتنسيش

*2007 جوزيه بيحسم الدوري وبياخد قرار يريح الاساسيين ويسافر في اجازة..الاهلي بيتغلب 3 ماتشات منهم الديربي اللي لاعيبة الزمالك نزلوا مستحلفين اللي هو احا استحالة نخسر من دكة الاهلي *2007 نهائي الكاس فريق الزمالك بعد سلسلة هزايم مهينة كسب ماتش البدلاء فنازل بروح جديدة انه ممكن يعملها تاني وفعلا النتيجة 2-1 و وفاضل دقايق والاهلي ضاغط...تريكة يظهر بلمسة سحرية بكعبه...اسامة حسني والجول فاضي تقريبا بيطلعها بره" شكله مش يومنا وربنا مش رايد" " اكيد مش هنفضل نكسب علي طول"...بس ابو تريكة في ال90 كان له رأي تاني...الوقت الاضافي جمال حمزة بيسجل التالت... .تريكة بيقوم بدوره.. بياخد الكورة من بعد نص الملعب ويسقطها لاسامة والتعادل بعدها بنص دقيقة بيرقص اتنين لعيبة من الزمالك ويباصي لصديق اللي يرفع لاسامة والرابع...ملحمة اسطورية جديدة برعاية المايسترو.

 *2008 مع المنتخب تريكة بيضرب المثل..فعز نجوميته راجع من اصابة بيقعد احتياطي لزيدان فاول البطولة...مفتحش بقه معملش مشكلة مقالش انا النجم مقعدش احتياطي اول ماتش نزل اخر نص ساعة وقدم مستوي كويس ومسك ايقاع اللعب تاني ماتش نزل الشوط التاني احرز هدفين و قدر بعد كده يفرض نفسه عالتشكيلة الاساسية ..رفع شعار تعاطفا مع غزة فمشهد مفاجئ سقفناله عليه ...وصلنا للنهائي اخر ربع ساعة الشوالي لسه بيقول اللاعبين ميتين بدنيا ..كورة طويلة لاحمد حسن بتوصل لسونج...لعيبة مصر كلهم باستثناء زيدان قبل نص الملعب...لاعب واحد من الميتين بدنيا حط احتمال ان زيدان ممكن يخطف الكورة الصعبة...ضرب الاسبرنت...زيدان كان بيحارب وكسب الحرب وتريكة كان في المعاد..بطولة تانية عالتوالي والاسطورة هو هو صاحب كلمة النهاية "في كل تاريخ الكرة المصرية لم يخلق لاعب مثل ابو تريكة" .

 *مع تزايد اسطورة تريكة كارهينه واعداؤه كانوا بيزيدوا وكانوا بيحاربوه عكس الخرافات المنتشرة بتاعت الاعلام اللي كان معاه..حاربوه بيطريقتين ساعتها اول مرة فحفلة تكريم المنتخب كل اللعيبة جت وسط الجمهور وكان في سعد الصغير ونانسي ..تريكة لف للجمهور ومحضرش الغنا والرقص ومشي..عكس اللعيبة التانية اللي كانوا هايصين وحقهم...مسكوه سلخ وازاي وليه وقلة الذوق والجليطة وواحدة جاية من لبنان تغني ماتقعدش ليه وانه نشر الفكر الوهابي وخرا من اللي قلبك يحبه...والناحية التانية قعدوا يقولوا ده زيدان اللي تعب وابو تريكة مالوش لازمة- علي اساس ان لو تريكة ماجريش من قبل نص الملعب كانت حركة زيدان دي بقي ليها لازمة-...ابو تريكة رد بجايزة تاني احسن لاعب افريقي بعد اديبايور ورد بقسوة اكتر في القارات .

*كاس القارات ابو تريكة بيبتعد عن التسجيل ورغم كده بيكون هو النجم الاول في البطولة و بيتم اختياره فمنتخب البطولة مع الحضري ومش فاكر مين معاهم من مصر ...بيعمل كل حاجة فماتش البرازيل ويصنع 3 اهداف 2 بصورة مباشرة لزيدان والتالت بيبدأالكورة من نص الملعبب ويمشيها مع زمايله لحد مايوصلها لسيد بعد المنطقة منه لشوقي يهري نجوم البرازيل ترقيص يقدم اعلي المستويات ادام افضل اللاعبين " كل الكلام خلصته فيك ياابو تريكة بو تريكة ولا احلي بو تريكة يرفع الراس وهدف يرفع الرئوس" ادام ايطاليا كان تريكة في المعاد وكان صاحب الاسيست لحمص وحكم ايقاع اللعب كالعادة..خسرنا ادام امريكا بس قدمنا اعلي ماتشين فتاريخ المنتخب ...اعلي حتي من ماتش هولندا اللي حتي لو كنا كسبناه بس مالعبناش فيه ب2 جنيه كورة .

*الاهلي ادام الزمالك الزمالك كسبان 2-1 جمهور الزمالك فجأة بصوت واحد بدون مبرر بيشتموا تريكة بامه عاوزين يقولوا كسبنا وانت في الملعب سحرك مش هينفعك...تريكة ببوز الجسمة السحري بينكد عليهم ويخرسهم وبيتعلموا الدرس القاسي اللي جمهور الصفاقسي اتعلمه...ماتستفزش تريكة ده لمصلحتك انت والله...بيشاورلهم بايده بعد الجول هووووص...بيعتذر بعدها...مش مضطر يعتذر لناس شتمته بامه بس بيعتذر عشان هو تريكة .

*ماتش الملعب المالي الاهلي متأخر ومحتاج 3 اجوال...تريكة بينقذنا بهاتريك كالعادة *مجزرة بورسعيد الجمهور اللي بيحب تريكة اتقتل ادام عنيه ..فاوضة اللبس كان بيلقن الناس الشهادة..حاول علي قد مايقدر يرد الجميل لف بيوت الشهدا كلهم من محمود سليمان في الزقازيق لكريم جونيور في السويس حتي لما عمرو حسين مات كان اول واحد في العزا...مالعبش ماتش السوبر وعمل اللي يرضي الناس اللي كانت ضد عودة النشاط المحلي واتعرض لنص مليون غرامة وسحب شارة الكابتن مدي الحياة بس مهتمش .
*2012 تريكة احتياطي في نهائي افريقيا..بيضرب المثل تاني مبيفتحش بقه مابيعترضش اهم حاجة الاهلي يكسب مش مهم يبقي في الصورة وياخد اللقطة .

*2013 الاهلي فقبل النهائي ادام القطن ظروف مؤسفة والماتش بيتلغي وبيتعاد تاني يوم وارهاق شديد ...الاهلي متأخر بجول ...تريكة بتجيله الكورة علي دماغه بيرقص مدافع القطن عالهوا وبيحط التعادل وبنتأهل للنهائي فماتش العودة...في الذهاب ادام اورلاندو القدم الذهبية بتسعد الملايين منجديد بضربة حرة من فصيلة الماجيكو "الله عليك يا عم الناس تسعد كل الناس بقدم من ذهب بل من ماس"...اورلاندو بيتعادل وفي القاهرة تريكة مابينساش يمضي امضاءه المحبب فاخر نهائي فحياته..وبيروح فحضن التالتة شمال بعد الجول فمشهد علي بساطته بيعبر عن العلاقة بين تريكة والجمهور...بتيجي اللحظة وبيتغير بيمشي ببطء كانه مش عاوز يطلع ...بيودعنا برشاقته المعهودة فمشهد اسطوري مهيب غير قابل للنسيان...

 *تريكة كان له مجموعة كارهين كبيرة ابرزهم محمود معروف وميدو ومصطفي يونس وتوفيق عكاشة واحمد موسي وعصام شلتوت وغيرهم كتير منهم اللي زميل منفسن ومنهم اللي اعلامي حاقد ومنهم اللي اكل عيشه التعريص بس هتلاقي بينهم عاملين مشتركين...اولهم ان كلهم مايتقلعوش من رجلك وتانيهم ان تريكة عمره ماهيرد عليهم الاساءة بالعكس ممكن يقابل حد فيهم زي الغندور من يومين في المغرب ويحضنه عادي رغم انه ياما شتمه وقل ادبه عليه وقالك ده ارهابي ضد البلد....بس هو بيتعامل باخلاقه مش باخلاقهم....انا ميهمنيش ومايلزمنيش انتماء ابو تريكة السياسي دي حاجة تخصه اللي يخصنا هو الفرحة اللي فرحهالنا واللي احنا شفناه منه .

 *هيقولك ياعم ده الغطاس وياما جاب بنالتيات كسب بيها الاهلي بطولات ..هتقوله طب قولي كده 3 بطولات تريكة كسب بيهم الاهلي ببنالتياته ؟ مش هيعرف يرد..هتقوله طب قولي علي 10 بنالتيات اونطا ابو تريكة مثل فيهم 10 بنالتيات علي مدار 10 سنين محلي وافريقي ودولي يعني بمعدل بنالتي في السنة ياعم؟...مش هيعرف يرد برضه هيجيبلك بنالتي حرس الحدود اللي كان فيه اعاقة فعلا بس من بره المنطقة والحكم حسبها جوه واللي كان في دوري 2005 اللي الاهلي خلصه بفارق 40 نقطة عن الزمالك اللي فنش سادس...ايوه 40 نقطة انت ماقرتش غلط يعني بنالتي مش مؤثر علي اي خرا وممكن لو اتشقلب يجيبلك بنالتيين كمان غلط فمسيرة 10 سنين مع انك ممكن تجيبله 5 بنالتيات غلط لباسم مرسي فمسيرة اقل من سنة مع الزمالك...هيتخرس ساعتها ومش هيرد فانت سيبك منه عشان ده حافظ بقين بيرددهم وخلاص .

*تريكة اللاعب المصري الوحيد في التاريخ اللي الجمهور الجزائري حياه فماتش للاهلي هناك ...اللاعب المصري الوحيد اللي جمهور مغربي حياه فماتش الوداد هناك..تسمع كلام المعلقين العرب عنه جسمك يقشعر...بس خد بالك كل ده سببه الاعلام الاحمر اللي ادي تريكة فوق حقه زي ماهيقول صاحبك اياه اللي اتفقنا تضحك علي كلامه وماتجادلوش *تريكة اعتزل وهو احسن لاعب في افريقيا للمحليين وفي القايمة النهائية لاحسن 10 لاعبين علي مستوي افريقيا كلها محليين ومحترفين هو ومحمد صلاح ..اعتزل وهو جايب افريقيا لفريقه اعتزل وهو رقم واحد ....مفيش لاعب مصري اعتزل في المستوي ده....ابو تريكة لايقارن .

 *تريكة وقت مالفرقة وقعت كان اول واحد بيساند وبيروح التمرين واول واحد واقف جنب اللعيبة بعد اعتزاله ....تريكة في الشدة تلاقيه قبل الفرحة *عشان كده هيفضل ابو تريكة هو اللاعب المحبب لجمهور الاهلي مع الاحترام للجميع..ابو تريكة حالة خاصة متفردة اسطورية خارج المقارنة للاهلوية. حتي لو اشترينا كريستيانو وميسي مش هنحبهم اكتر من تريكة ..شكرا يا تريكة علي حالة جميلة عيشتهالنا...شكرا علي 10 سنوات رائعة شكرا علي حكاية ماانتهتش ومش هتنتهي وكل سنة وانت طيب .