أسباب ضعف سحب السيارة, ولماذا يزداد استهلاك العربية للبنزين


هذا المقال مكتوب بالعامّية لأنه منقول من نقاشات صفحة "وش سلندر" وهو يتكلم عن الأسباب التي تجعل السيارة تقل قدرتها على السحب أو اكتساب السرعة المطلوبة في الوقت الطبيعي

خلينا كدة نبدأ واحدة واحدة و ناخد الاسباب من الصغير للكـبير

1. فلتر الهواء

 فلتر الهوا طبعا مؤثر جداً لو مسدود أو مش نضيف بيأثر على العربية جداً و ده عن تجربة جرب تنضف فلتر الهوا بتاعك لو لسة جديد هتلاقى السحب اختلف و ياريت كل 20 ألف كيلومتر تغيره  و تجيب واحد جديد

- بوابة الثروتل ... أو بوابة الهوا لو مش نضيفة هتلاقى الموتور ميت مش ضعيف بس .. فكها كل فترة كدة و نضفها.

البنزين

- شوف يا سيدى دورة البنزين لو مش نضيفة  أو فيها شوايب يعنى هتقلل من سحب العربية حط من بنزينة نضيفة بقى
- غير فلتر البنزين كل 25 ألف كيلو - كل 3 شهور ابقى حط مرة أوكتان عشان تخش تنضف دورة البنزين و تخش على الرشاشات تنضفها و لو عربيتك بتاخد 92 حطلها برضة 95 كل 3 شهور مرة مع الاوكتان هتعمل معاك شغل فاجر .

3. البوجيهات و أسلاكها

- البوجيهات مهمة جدا و الناس لما بتيجى تغير البوجيهات مش بتغير السلك .
- لازم علي الأقل كل 35 ألف كيلو تغير طقم بوجيهات لأن مع الوقت بتكون طبقة كاربون كبيرة عليها و شرارتها بتضعف و بالتالى السحب بيقل و كمان ممكن العربية متدورش معاك من أول مرة عشان البوجيهات ضعفت خلاص.

4 - الفتيس

الفتيس طبعا مهم جدا فى نقطة السحب .. لو الاسطوانة و الديسك متاكلين و بيجيبو اخرهم بيخلى سحب العربية يقل و كمان يخلى العربية تسخن فوق العادى و كمان هتحتاج تعزم ليها جامد لأن الاسطوانة بتكون فضيت و بالتالى هتاكل بنزين زيادة .

الكاوتش (الإطارات)

الكاوتش عليه عامل كبير جداً .. لو الطبقة مشققة أو متاكلة أو عدت ال 35 الـ 40 الف كيلو يبقي الافضل لانة بيبقى كمان عرضة انة ينفجر او يفتل معاك فى اى لحظة و كمان هياكل بنزين و يقلل السحب.

حساس الشكمان

أو اللى اسمة حساس الاكسجين دة لو بايظ او بيودع الحياة خليط الهوا و البنزين مش هيبقى بالنسبة المظبوطة و يقلل السحب .

7 - الرشاشات

 ازاى ؟ لو فى رشاش تعبان .. هيعمل حاجة من الاثنين هيرمى بنزين زيادة عشان يولع مع الهوا و يتم الاحتراق و بالتالى العربية تاكل بنزين او هيرمى بنزين اقل من المطلوب يقوم يسبب ضعف فى السحب طب و الحل ؟ انك تعمل اختبار رشاشات كل 50 الف كيلو و دة بيبقى عن طريق جهاز بيختبر قوة الرشاشات و بينضفها و هتلاقية فى اى مركز صيانة نضيف .

 
Disqus Comments
© copyright 2017 المحمول جميع حقوق الطبع والتعديل محفوظة ل: موقع المحمول المحمول